第六場，「飛鷹翱翔」係一隻必須要自行領放先跑得最出色嘅馬。佢今次用到阿妹，唔使問，畀佢嘅策騎指示，一定係盡放，而且咁輕磅，唔通叫小朋友留住跑。但係，呢場馬同場仲有「健康愉快」、「飛輪步」同「晨曦麗人」四隻快馬，特別係隻短途馬「晨曦麗人」。咁當然，如果佢內側呢四隻快馬個個出閘後都捉住唔搶，咁就冇計，但只要有一隻半隻頂下佢，阿妹排十一檔放快咗，造成呢場有偏快步速，其實一啲都唔出奇。如果步速一快，咁潘頓、布文兩大師傅一對馬，就會啱跑到不得了。「競駿輝煌」早幾場畀田泰安跑，次次步速唔夠快，次次自己鬥口鬥乾曬，今次加個眼罩，如果步速唔快，可能會難發揮，但如步速一拉快，應該會幫到呢隻馬。布文隻「堅又威」，之前贏1400嗰場，正正係「飛鷹翱翔」，第二段快到21秒52，頭1000米放到57秒22，而佢喺內欄賺曬殺上嚟贏，如果今場小朋友又一次咁放法，佢嘅形勢會同嗰次一模一樣。所以呢場馬，可以賭潘頓、布文呢條單Q，如萬一個個真係捉住唔放，益咗阿妹，就保險注補多條鐵角，反正阿妹隻馬一定好分啲，全日重心我諗呢場。
文匯報
