兆　文

第四場第四班1000米。「時時歡欣」試閘大勝三個馬位，並用到潘頓，誓必成為焦點，但要留意隻馬韁口好重，更重要今場不乏高速快馬，快鬥快肯定蝕底。

話明步速快，自然昅住後上馬，博一博連續三場開出最快末段的「鄉村樂韻」，而呢三場亦得兩冠一亞，至吸引兩勝均由田泰安操刀，顯示對田雞大開大合的騎法好受落。其實，縮番跑1000原本有啲擔心，但初三蔡廄「勁者」、「辰居武士」出爭兩場四班1200不是餐士馬，並非我預期準備就緒的「跨境寶馬」，故「鄉村樂韻」肯定不是讓路，是存心出爭直路賽。再看最近試閘末段捉唔住撲上嚟，狀態弗爆，捧場倍添信心！

第六場第四班1400米。「文明福星」頭四戰全是大冷門，前仗突然僅得12倍，票數已有啟示，未致於飛到馬到，不過輸兩個半馬位大有進展。

「文明福星」進度轉好，上仗改攻更啱跑更合腳法的同程1400米，由於排喺外檔焗住留得後，形勢被動更遇慢步速，誰不知形勢惡劣到痹，尚要直路上希威森堅持要走出外邊，亦因此受困好遲望空，如此情況都跑到第四。錯了一次，預期希威森今次唔會再錯，睇埋周五親跳落足心機，而「文明福星」亦淡淡定，當然成套操練工夫前所未見完整，試完大閘，跟手埋門先一課快磨，再一課慢跳，出擊的心意也昭然若揭。