香港文匯報訊（記者 子棠）薛家燕首個英語迷你網劇《選美兄弟班》將於12月5日在各大社交平台全球上架，劇集由王梓軒、石祐珊及導演Simon Yin擔任主創團隊，故事以溫哥華舉辦的第一屆男子選美比賽為背景，描寫有關友誼、野心與娛樂圈秘聞的故事。劇中，家燕姐放下一貫的慈母、搞笑形象，挑戰「雙面人」角色，全因身兼主創人及主演的梓軒不想浪費家燕姐的演技，設計了家燕姐的角色是人前好歡樂，但面對黑幫大佬又變得好強硬，令家燕姐過足戲癮實行演技大爆發。

家燕姐笑指角色好有型：「梓軒想我嘅演繹同平時唔同，對我嚟講係幾特別嘅角色；今次亦係首次以英語對白拍攝，要邊演邊記住啲英文對白，好彩有梓軒提示。我初初以為網劇簡單啲、輕鬆啲，但係劇組拍到好似電影咁、好嚴謹，我都學到好多嘢；佢哋又對我照顧有加，整個拍攝過程很順利；雖然溫哥華啲天氣凍咗少少，但因為佢哋個個都好Nice令我覺得好溫暖。」

《選》劇班底個個分量十足，還有不少演員參與，包括梓軒、鍾麗緹大女兒Yasmine（嚴書琴）、曾參與美劇Power Rangers 的張遙霹、憑劇集《幕府將軍》贏得最佳動作特技的Darren E Scott、加拿大第一代華人YouTuber Davin Tong及多位參選今屆溫哥華華裔小姐的佳麗，亦將於劇中驚喜現身。家燕姐大讚拍攝得好興奮：「Yasmine靚女又好戲，演員個個都好好，事前工夫又做得足。同埋我都好耐冇嚟溫哥華，今次見返好多朋友，難得可以敘吓舊。咁啱呢邊又重播《皆大歡喜》，個個都好熱情，又喺街叫我『慈姑』，我有返咗屋企嘅感覺。」

梓軒更有份創作和製作劇集內的歌曲，提到創作靈感，梓軒說：「溫哥華係『華姐之都』，有廖碧兒、鍾嘉欣、李亞男、岑麗香等，呢個地方就好似一個跳板咁，期望《選美兄弟班》能夠引起世界各地網民的共鳴。」