香港文匯報訊（記者 子棠）鍾嘉欣（Linda）舉行的一連三場《Remember記得·鍾嘉欣演唱會》佛山站前晚圓滿落幕，三場均座無虛席，Linda更罕有獲父母及子孻囡Anika由溫哥華到佛山捧場，難怪Linda指佛山站演唱會，對她來說別具意義。

佛山站與Linda之前的廣州站演出，在個唱流程、舞台設計、服裝及燈光效果都截然不同。她說：「有咗上次經驗，今次心態有啲唔同，亦都變得輕鬆咗，今次重點反而係點樣令個演唱會進步，希望每場演出都畀到觀眾新鮮感。佛山站演出除保留『扔花球』，還加插令我最難忘的『民選』歌曲環節；仲有一個環節，係觀眾一齊唱《月亮代表我的心》，令我好感動，因為我𠵱家住得比較遠，但仍然可以心連心，保持着呢種關係係好難得。」

繼廣州站個唱得到一班好姊妹及好友到場，今次佛山站亦有「重量級」觀眾撐場。Linda說：「係我好重要嘅人嚟睇我演唱會，佢哋係我阿爸阿媽同埋細囡，其實我入行咁耐，阿爸阿媽好少機會睇我演出，阿爸直頭係未睇過，好開心佢哋終於可以睇到，親身見證佢哋個女努力嘅表現。因為我大囡同個仔都要返學，所以淨係細囡嚟，佢都係第一次睇我演出，反應好興奮，雖然佢戴住耳塞，但都睇到又跳又唱。」Linda還感謝梅小青及劉家豪撐場。Linda續說，獻唱《做你的晨曦》時，被觀眾席上的媽媽感動到喊：「呢首歌係講我對女兒嘅愛，因為今次媽媽在場，唱呢首歌時會憶起好多媽媽湊我嘅回憶，令我忍唔住喊，冇諗過自己會喊，好感動，所以每次望到觀眾席上嘅爸爸媽媽同個囡，我都要避開視線。」Linda又表示三名子女當中，覺得Anika最有機會繼承其表演的「衣缽」：「佢雖然只有兩歲，但性格比較外向，把聲好大聲又清脆，唱歌應該會幾好聽，而且佢一聽到音樂及拍子聲就會跳舞，好有節拍感。」Linda透露一家五口將來港過聖誕節。